सेजिया से सैंया रुठी गइलें हो रामा... - नव मिथिला - maithili news Portal

Breaking

Post Top Ad

Post Top Ad

Monday, April 8, 2019

सेजिया से सैंया रुठी गइलें हो रामा...



मिथिला महिला समिति विभिन्न कार्यक्रमक संग मनओलक जूड़ शीतल

अरुण पाठक
बोकारो (झारखंड): मिथिलांचलक परंपरा मे जूड़ शीतल पावनि के एकटा अलग खासियति अछि। एहि पारंपरिक पावनि के शनिदिन (6 अप्रैल 2019) क मिथिला सांस्कृतिक परिषद, बोकारो के अनुषंगी इकाई मिथिला महिला समिति द्वारा विभिन्न कार्यक्रमक संग मनाओल गेल। नगर के सेक्टर-4ई स्थित मिथिला एकेडमी पब्लिक स्कूलक सभागार मे मटका प्रतियोगिता एवं बड़ी बनाबक खेलक आयोजन कएल गेल। कार्यक्रमक दौरान समितिक सदस्यासभ मनभावन सांस्कृतिक कार्यक्रमक प्रस्तुति कयलनि। शुभारंभ सर्वमंगल मांगल्ये... देवी स्तुतिक संग भेल। तकर बाद रामनवमी के अवसर पर सोहर नृत्यक प्रस्तुति कएल गेल। तत्पश्चात जूड़ शीतल के लऽकऽ मटका प्रतियोगिता एवं बड़ी बनाबक प्रतियोगिता आयोजित कएल गेल। अंत में रीना दास द्वारा प्रस्तुत चैतावर ‘सेजिया से सैंया रुठी गइलें हो रामा...’ गीतक संग कार्यक्रमक समापन भेल। मटका प्रतियोगिता मे मुन्नी झा, किरण मिश्रा आ पूनम लाल तथा बड़ी बनाबऽ प्रतियोगिता मे आशा झा, जयंती पाठक आ’ प्रीति राय क्रमशः पहिल, दोसर आ’ तेसर स्थान पर रहलीह।

कार्यक्रमक मुख्य अतिथि सीमा ठाकुर तथा विशिष्ट अतिथि मिथिला एकेडमी पब्लिक स्कूलक प्राचार्या श्रीला लाल व डाॅ रुचि शिवम प्रतियोगिताक विजेता प्रतिभागीसभकें पुरस्कृत कयलनि। ओ समितिक गतिविधिसभक सराहना करैत कहलनि जे संस्था जतय एक दिस मिथिलांचलक कला-संस्कृति पर केंद्रित विभिन्न कार्यक्रमक आयोजन करैत अछि ओतहि सामाजिक कार्य व जरूरतमंदसभक मददि करबा मे सेहो प्रशंसनीय भूमिका निमाहि रहल अछि जे अन्य संस्थासभ लेल सेहो अनुकरणीय अछि। कार्यक्रम मे मुख्य रूप सँ मिथिला महिला समितिक अध्यक्ष अंजू झा, सचिव उषा झा, कोषाध्यक्ष संगीता मिश्रा सहित नीलू झा, पूनम मिश्रा, नूतन झा, रेखा श्रीवास्तव, पूनम लाल, रानी दास, नंदा झा, रीता झा, आभा झा, शीला मिश्रा, लीला झा, इंदिरा झा, सुधा झा, सुशीला रानी, रुबी ठाकुर, आशा झा, कंचन झा, पूनम सिंह, मालती सिंह, किरण कुमारी, किरण मिश्रा, चंदा झा, भारती झा, सोनल आदि उपस्थित छलीह। कार्यक्रमक संचालन संगीता मिश्रा कयलनि।

Post Top Ad